පොත් ලැයිස්තුව
මා එකවරම අවදි වූයේ උස් කටහඩකින් ඒ ඉතා සුවබර කෙටි නින්දට බාධා කළ හෙයිනි, ඒ බසයේ කොන්දොස්තර තැනය. බෝඩිම කරා යාමට පානදුර බසයකට දෙහිවලින් ගොඩ වූවා මතකය, මිනිත්තුවෙන් දෙකෙන් නැවත ප්‍රකෘති තත්වයට පැමිණියේ මේ දිනවල පාඩම් වැඩ විසින් සොරා ගනු ලැබූ නින්ද මෙසේ කොටස් වශයෙන් ගෙවීමට සිදුවීම පිළිබඳව නොපහන් සිතකිනි.
බස් රථය ගමන් කරනා ඉසව්ව දැන ගැන්මට කවුළුවෙන් එපිටට ඇස් යැවීමට තැත් කළ දෑස්, අසුනේ කෙලවර මගියා ලඟ නැවතුනේ නිරායාසයෙනි. මම බසයට ගොඩවන විට මෙම අසුන හිස්ව තිබුනා යාන්තමට මතකය, එනම් ඔහු ඉඳගෙන ඇත්තේ මීට මඳ වේලාවකට පෙර යැයි මම උපකල්පනය කලෙමි.
මදක් අවුල් වූ පැසුණු හිසකේ සහිත වූ ඔහු, දහදිය-තෙල් බිඳු වලින් නොඅඩු නළලත නිතර පිස දැම්මේය. පැරණි නමුත් පිරිසිදු කමිසයකින් හා කලිසමකින් සැරසී සිටි ඔහු පැරණි තාලයේම අඩි ඝණකම් සපත්තු ජෝඩුවක්ද පැළැඳ සිටියේ ය. එක් අතකින් ඔෆිස්-බෑගයක් ඉනට තබා තද කර ගෙන සිටි ගමන්ම දකුණතෙහි වූ එළවළු මලු කිහිපය තැබීම සඳහා ඉඩක් සොයමින් හුන්නේ ය. දිගු කාලයක් ඝණ, බර උපැස් යුවළ පැළැඳීමෙන් ඇතිවූ සළකුණු ඇස්යට හා නාසය දෙපස දක්නට ලැබිණ.
මාගේ කුහුල දැනවූ කරුණ ඉහත කිසිවක් නොවේ, වරින් වර තම වමතින් කමිස සාක්කුවෙහි වූ කොළ කැබැල්ලක් ඉවතට ගෙන එදෙස හකුළුවා ගත් දෙනෙතින්, ආයාසයකින් කියවා නැවත සාක්කුව තුල රුවා ගැනීමේ ක්‍රියාවලියයි. හතරවැනි හෝ පස් වැනි වරටත් එය සිදුවන විට මාගේ දෙනෙතත් එදෙස නිතැතින්ම යොමු විණ. මදක් පොඩි වූ කඩදාසියේ පැන්සලකින් රවුම් බෝල අකුරින් ලියා තිබුණේ බඩු ලැයිස්තුවකි. හුරුපුරුදු පොත් කිහිපයක නම් සහ තවත් නොපැහැදිලි සටහන් කිහිපයක් එහි විය.
ඊලඟට ඔහුගේ පියවර මදක් වෙනස් විණි. එළවලු මලු බිම තැබූ ඔහු ඒවා ස්ථායී බව පසක් වනතුරුම එදෙස බලා හුන්නේ ය. තම වමත හා ඉණ අතර තිබූ බෑගය ගෙන උකුල උඩ තබා ගත්තේ තාවකාලික මේසයක් තනා ගනිමින්. ඊලඟට ඔහු තම උඩ සාක්කුව මුළුමනින්ම වාගේ සෑදූ මේසය මතට ගෙන හැරියේ ය. කඩදාසිකොල කිහිපයක්, ප්‍රවේශ පත්‍ හෝ එවන් කිසිවක්, කාසි ගොඩක් හා ගුලිවූ දහයේ-විස්සේ-සීයේ නෝට්ටු කිහිපයකට වැඩි යමක් එහි නොවී ය.
එක් නෝට්ටුවෙන් නෝට්ටුව දිග හැරි ඔහු අන්තිම රුපියල තෙක් ගැන්නේය. දෙවරක්, තෙවරක් ගැන්නේය. නතර කලේ එකතුව කලින් වරට වඩා සතයකුදු වැඩි නොවූ බැව් කිහිපවරක් පසක් කර ගත් පසුවය.
අප හිඳගෙන සිටියේ බසයේ අවසාන අසුන් පෙලට ඉදිරි අසුන් යුගලෙහිය. පසුපස පෙල හැරුණුකොට මුළු බසයම හා එහි ගමන් ගන්නා මගීහු මෙහි සිට කදිමට නැරඹිය හැක. මේ වනවිට බසයේ අසුන් ප්‍රමාණයටම වාගේ මගීහු සිටියහ. කිහිපදෙනෙක් නිදිමතේ වැනෙමින්ද, සමහරු කවුළු වලින් එපිට කොන්ක්‍රීට් ලෝකය දෙස විමසිල්ලෙන් බලාසිටිමින්ද, තරුණයෝ ඊලඟට බසයට ගොඩ වන තරුණිය දෙස අයාගත් මුවකින් යුතුවද, තරුණියෝ යටකී තරුණිය දෙස උල් කරගත් මුහුණුවලින් යුතුවද බලා සිටියහ.
පස් වැනි පන්තියේය කිවහැකි පාසල් නිළ ඇඳුමින් සැරසුණු දරුවන් දෙදෙනෙකු තමන්ගේ කිහිලි අතර රුවාගෙන සිටි කාන්තාවන් දෙදෙනෙකු ඉදිරි අසුන අරක්ගෙන සිටියහ. හාත්පස අඳුර වැටෙන්නටත් ආසන්නය දරුවන් දෙදෙනා තවම උදෑසන ඇඳගත් ඇඳුමින්ය, සුදෝසුදු කලිසම් පොඩි කිළුටු වී ඇත, ඈලි මෑලි මුහුණ ද හෙම්බත් වූ ශරීරයද රටේ පාලන පක්ෂය සිහි කරයි. ඔවුන්ගේ පොත් බෑග මවුවරුන්ගේ උකුළු රජයද්දී, ඔවුන්ට හිමිවූ තැන ගැන මදකට හෝ තැකීමක් නොකැර නිදි කිරා වැටෙයි.
මදක් උස, බොකුටු කොණ්ඩයක් හා කෙසඟ සිරුරක් ඇත්තී, පළමුවැන්නී කථනයට අධිපති දේවයන් වැන්න. තම බුද්ධිමත් බව කතාවෙන් හා රඟනයෙන් පෙන්වීමට සරු උත්සාහයක යෙදී සිටියා ය. දරුවන්ට හොඳම ටියුෂන් ලබා දෙන හැටිත්, ඔවුන්ව පාසැලේ දීප්තිමත් සිසුන් අතරට යවන සැටිත්, ක්‍රිකට් හා සංගීත පුහුණු පන්ති වල වැදගත් කමත් ගැන ඕ කතා කලාය. දෙවැන්නී තරබාරු දේහ දාරිනියක වූවා ය. තම අළු වැහැති වූ කෙස් රොද නිතර කන පිටුපස රුවා ගැනීමේ නොදැනුවත් අභ්‍යාසයක ඈ ගැලී සිටියා ය. මනා සංයමයකින් යුතුව වචන තෝරා බේරා කතා කල ඈ, නිතරම මාතෘකාව වෙනතක යොමු කරවන්න තැත් කලාය. කෙසේ උවද බඩු මිළ හෝ ඇඳුම්-පැලැඳුම් තබා හලාල් සහතිකයට වත් එම කාරණය ඉෂ්ඨ කිරීමෙහි ලා අසමත් විණි.
තම ස්වාමි පුරුෂයා රජයේ ඉහල නිළදරුවෙකු බවත්, අද පඩි දවස බැවින් ඉක්මනින් ගෙදර ගොස් ඔහුට ප්‍රිය කෑමක් සෑදීමේ අවශ්‍යතාවය ගැනත් ඈ කීවාය. ඈ තව බොහෝ දේ කීවා ය...
මගේ අවධානය නැවතත් අසල්වැසියා වෙත යොමුවන විට ඔහු සකස් කල මේසය හකුලා ගෙන සිටියේ ය. හිල් බැල්මකින් කවුළුවෙන් එපිට බලා සිටියේ ය. ගුලිකල කුඩා කඩදාසි කැබැල්ලක් ඔහුගේ දෙපා ලඟ වැටී තිබිණි.
|
|
0
comments
